دو چشمی" ھ" اور آدھی" ہ " میں فرق

 *” ھ “ اور ” ہ “ میں فرق* 

..................................................

” ھاں “ اور ” ہاں “ کیا دونوں درست ہیں؟ اِسی طرح ” ہم “ اور ” ھم “ میں کیا فرق ہے ؟؟؟ 

جان لیجیے! اُردو میں دو چشمی ” ھ “ جسے ( ہاے مخلوط کہتے ہیں ) کا استعمال دو حروف تہجی بنانے کے لیے ہوتا ہے ۔  مثلاً :

بھ ، پھ ، تھ ، ٹھ ، جھ ، چھ ، دھ ، ڈھ ، گھ ، اور لھ وغیرہ ـ 

بعض جگہوں پر خوب صورتی یا کسی اور وجہ سے لوگ ابتدا میں ” ھ “ کا استعمال کرتے ہیں مثلاً : ” ھم “ ، ” ھماری “ اور ” ھاں “ وغیرہ ـ 

مگر یہ استعمال درست نہیں ہے ـ اولاً  اس لیے کہ اردو میں ” ھ “  ابتدا میں کبھی آ ہی نہیں سکتا ـ کیوں کہ یہ صورت عربی سے آئی ہے ـ

یہاں ذوق کا ایک شعر اہلِ ذوق کی نذر کرتا ہوں : 

*ہائے رے حسرتِ دیدار ، مِری " ہاے " کو بھی*

*لکھتے ہیں ہاے دو چشمی سے ، کتابت والے* 

ثانیاً دو چشمی ” ھ “ کی اکیلی مستقل آواز نہیں ہے بلکہ اسے کسی دوسرے حرف کے ساتھ ملا کر لکھا اور پڑھا جاتا ہے ، دو چشمی ” ھ “ اردو میں ہندی زبان سے اخذ کی گئی ہے اور یہ صرف چند حروف کے ساتھ ہی آسکتی ہے ، اردو کے تمام حروف تہجی کے ساتھ نہیں آسکتی مثلاً :

بھ ، پھ ، تھ ، ٹھ ، جھ ، چھ ، دھ ، ڈھ ، گھ ، اور لھ وغیرہ۔ 

اس کے علاوہ باقی حروف کے ساتھ دوچشمی ” ھ “ نہیں آتی ، جب کہ ” ہ “ کی الگ مستقل آواز ہوتی ہے ـ

ذیل میں دوچشمی ” ھ “ یعنی ہاے مخلوط اور ” ہ “ یعنی ہاے ملفوظ کے چند جملے لکھے جارہے ہیں ، انھیں پڑھ کر ہمارے قارئین کو اندازہ ہوجائے گا کہ ان دونوں کے پڑھنے میں کیا فرق ہے اور اُردو زبان میں یہ دو مختلف ھ/ہ الگ الگ کیوں رائج ہیں اور ان کی اہمیت کس قدر ہے ـ

دیکھیے : لفظ " بھاتے اور بہاتے " پہلے میں ہاے مخلوط اور دوسرے میں ہاے ملفوظ ہے ـــــ اب ان دونوں کا ایک ایک جملہ ملاحظہ کیجیے : 

✨ ہاے مخلوط ” ھ “ کے ساتھ مثال : ننھے مُنے بچے مَن کو *بھاتے* ہیں

✨ ہاے ملفوظ ” ہ “ کے ساتھ مثال : لاپروا لوگ پانی زیادہ *بہاتے* ہیں 

دیکھیے : لفظ " پھاڑ اور پہاڑ " 

✨ ہاے مخلوط ” ھ “ کے ساتھ مثال : بچے نے کاپی کا صفحہ *پھاڑ* دیا

✨ ہاے ملفوظ ” ہ “ کے ساتھ مثال : *پہاڑ* پر چڑھنا ایک مشکل کام ہے

دیکھیے : لفظ " تھ اور تَہ " 

✨ ہاے مخلوط ” ھ “ کے ساتھ مثال : دنیا کا ایک مُلک *تھائی* لینڈ بھی ہے

✨ ہاے ملفوظ ” ہ “ کے ساتھ مثال : ایک *تِہائی* کام ہو گیا ہے دو تِہائی باقی ہے 

دیکھیے : لفظ " ٹھ اور ٹہ " 

✨ ہاے مخلوط ” ھ “ کے ساتھ مثال : آج کل اُن دونوں کی آپس میں *ٹھنی* ہوئی ہے 

✨ ہاے ملفوظ ” ہ “ کے ساتھ مثال : درخت کی *ٹہنی* پر بلبل نغمہ سرا ہے 

دیکھیے : لفظ " جھ اور جہ " 

✨ ہاے مخلوط ” ھ “ کے ساتھ مثال : قرض کے بار نے *بوجھل* کر دیا ہے

✨ ہاے ملفوظ ” ہ “ کے ساتھ مثال : *بوجہل* کو محبوب ﷺ دکھائے نہیں جاتے 

دیکھیے : لفظ " چھ اور چہ " 

✨ ہاے مخلوط ” ھ “ کے ساتھ مثال :قربانی کے جانور کے لیے *چھرا* تیز کرو

 ✨ ہاے ملفوظ ” ہ “ کے ساتھ مثال :خوش خبری سُن کر اُس کا *چہرا* کِھل اُٹھا 

دیکھیے : لفظ " دھ اور دہ " 

✨ ہاے مخلوط ” ھ “ کے ساتھ مثال : صبح صبح میرا *دھندا* ( کاروبار ) خراب نہ کرو

 ✨ ہاے ملفوظ ” ہ “ کے ساتھ مثال :مذہبِ اہلِ سنت ہی نجات *دہندہ* ہے اسے مضبوطی سے تھام لو 

دیکھیے : لفظ " کھ اور کہ " 

✨ ہاے مخلوط ” ھ “ کے ساتھ مثال : میرا قلم کہیں *کھو* گیا ہے

✨ ہاے ملفوظ ” ہ “ کے ساتھ مثال :اب *کہو* کہاں جانے کا ارادہ ہے ؟

دیکھیے : لفظ " گھ اور گہ " 

✨ ہاے مخلوط ” ھ “ کے ساتھ مثال : جنگلات میں *گھنے* درخت ہوتے ہیں

✨ ہاے ملفوظ ” ہ “ کے ساتھ مثال : اُس نے اپنی شادی پر *گہنے* اور دیگر زیورات پہنے تھے 

قارئینِ باتمکین! یہ چند جملے صرف دوچشمی ” ھ “ اور ” ہ “ کے آپس میں فرق کو واضح کرنے کے لیے بہ طور مثال لکھے ہیں ، ورنہ اور بہت سے الفاظ ہیں جن میں ” ھ " کی جگہ ” ہ “ اور اِس کے برعکس لکھنے سے لفظوں کی بناوٹ کیا سے کیا ہو جائے اوپر دی گئی مثالوں سے آپ سمجھ چکے ہوں گے ـ اُردو ہماری اپنی اور بہت ہی پیاری زبان ہے اس کی ترویج کے لئے حتی المقدور ( طاقت بھر ) کوشش کیجیے ......... خود اُردو بولیے ، لکھیے اور لکھتے وقت اِملا و انشا کا خاص خیال رکھیے ـ بچوں کے ساتھ اُردو میں بات کیجیے تا کہ اُن کی زبان صاف  ہو۔